Հրապարակային օֆերտա
«Լիստ Գրուպ» ՓԲԸ-ն հանդիսանալով ինտերնետային հարթակի սպասարկող/սեփականատեր, www.list.am համացանցային կայքի, ինչպես նաև «list.am» բջջային հավելվածի միջոցով առաջարկում և/կամ իրականացնում է անձանց անորոշ շրջանակին հասցեագրված ապրանքի վաճառք: Սույն օֆերտայով կարգավորվում են ապրանքների ձեռք բերման պայմանները և կարգը:
1.Հասկացություններ
1.1.
Ընկերություն` «Լիստ գրուպ» փակ բաժնետիրական ընկերություն:
1.2.
Գնորդ` Ընկերության Հարթակում գրանցված կամ Հարթակի միջոցով գնում իրականացնելու ցանկություն հայտնող ցանկացած ֆիզիկական կամ իրավաբանական անձ:
1.3.
Վաճառող՝ Ընկերության հետ համագործակցող և Հարթակի միջոցով էլեկտրոնային առևտուր իրականացնող իրավաբանական անձ կամ անհատ ձեռնարկատեր, ում կողմից առաջարկվող Ապրանքները ներկայացված են Հարթակում:
1.4.
Հարթակ` առցանց առևտրի ապահովման գործիք, որը ներառում է Ընկերության կողմից սեփականության կամ օգտագործման իրավունքով շահագործվող սարքավորումների և ծրագրային ապահովումների ամբողջությունը, որն օգտագործվում է www.list.am համացանցային կայքի և «list.am» բջջային հավելվածի միջոցով ինտերնետ միջավայրում առցանց ապրանքների ներկայացման, վաճառքի և դրա հետ կապված գործառնություններ կատարելու համար։
1.5.
Ապրանք` վաճառքի համար նախատեսված և տվյալ պահին հասանելի արտադրանք, որը ներկայացված է Հարթակում:
1.6.
Առաքիչ՝ առաքման ծառայություններ մատուցող անձ:
1.7.
Գնում, Գնման հայտ, Հայտ ՝ Գնորդի կողմից Հարթակի միջոցով ներկայացված հայտ։
1.8.
Ծառայություն՝ Հարթակի միջոցով Վաճառողին մատուցվող գործակալական ծառայություն։
1.9. Հայտի
ձևակերպում՝ Գնորդի կողմից հայտի լրացում և պատվերի արժեքի ամբողջական վճարում։
2.
Ընդհանուր դրույթներ
2.1.
Գրանցվելով սույն Հարթակում և/կամ գնելով Ապրանքներ Գնորդն ընդունում է սույն օֆերտան և համաձայն է Ապրանքների վաճառքի պայմաններին:
2.2.
Գնորդը համաձայնվում է իր անձնական տվյալների մշակումը Ընկերության Հարթակում հրապարակված Անձնական տվյալների մշակման քաղաքականության համաձայն իրականացնելու համար:
2.3.
Գնորդն Ընկերության կայքում գրանցվելու, Գնման հայտը լրացնելու դեպքում Ընկերությանը տրամադրում է և/կամ Վաճառողին հասանելի է դարձնում անձնական տվյալների պաշտպանության քաղաքականության մեջ նկարագրված անձնական տվյալները:
2.4.
Եթե Գնորդը տրամադրում է որևէ կեղծ, ոչ ճշգրիտ կամ թերի տեղեկություն, կամ եթե Ընկերությունը ունի հիմնավոր պատճառներ կասկածի տակ դնելու այդ տեղեկության ճշմարտացիությունը, ճշգրտությունը կամ ամբողջականությունը, ապա այն կարող է մերժել Գնորդի հետագա մուտքը Հարթակ։
2.5.
Հարթակում գրանցվելիս Գնորդն ընտրում է օգտանուն և գաղտնաբառ, որոնք խիստ գաղտնի են և ենթակա չեն փոխանցման Գնորդի կողմից որևէ երրորդ անձանց:
2.6.
Եթե Գնորդի մուտքային տվյալները գողացվել, հրապարակվել, կորել կամ վերջինիս կողմից մոռացվել են, ապա Գնորդը պարտավորվում է անմիջապես տեղեկացնել Ընկերությանը՝ հաշիվը արգելափակելու կամ գաղտնաբառի վերանայման նպատակով:
2.7.
Եթե Գնորդի կողմից կցված վճարային քարտը գողացվել է և/կամ խարդախորեն օգտագործվում է երրորդ անձի կողմից, ապա Գնորդը այդ մասին իմանալու պահից անհապաղ տեղեկացնում է քարտը թողարկող բանկին:
2.8.
Եթե ՀՀ օրենսդրությամբ Ապրանքի ձեռք բերման համար նախատեսված են տարիքային կամ այլ սահմանափակումներ և տվյալ Ապրանքի Գնորդը չի համապատասխանում չափանիշներին, ապա Ընկերությունը իրավունք ունի մերժելու Գնումը:
3.
Գնումների ձևակերպան կարգը և իրականացման պայմանները
3.1.
Գնորդը նախքան հայտ գրանցելը ընտրում է Ապրանքը :
3.2.
Գնորդը հայտը ձևակերպելիս պարտավորվում է տրամադրել հավաստի և անհրաժեշտ տեղեկություններ` այդ թվում առաքման ճիշտ և ամբողջական հասցե:
3.3.
Գնորդը հայտը ձևակերպելու ընթացքում ծագած խնդիրների լուծման համար կարող է կապ հաստատել ընկերության աջակցության կենտրոնի հետ:
3.4.
Գնորդն իրավունք ունի Գնման հայտը չեղարկել միայն Վաճառողի համաձայնությամբ՝ նախքան Վաճառողի կողմից հայտի հաստատումը:
3.5.
Ընկերությունը Գնման հայտը անմիջապես փոխանցում է համապատասխան Վաճառողին, եթե այլ բան սահմանված չէ սույն օֆերտայում: Եթե որևէ պատճառով հայտը հնարավոր չէ հաստատել, ապա Ընկերությունը հնարավորինս սեղմ ժամկետներում այդ մասին տեղեկացնում է Գնորդին:
3.6.
Գնորդի կողմից Հայտը ձևակերպելուց հետո 48 ժամվա ընթացքում Վաճառողը այն հաստատում կամ մերժում է։
3.7.
Հայտը Վաճառողին փոխանցվելուց և հաստատվելուց հետո Ապրանքի առաքումը կազմակերպվում է Առաքչի կողմից Հարթակի միջոցով Հայտի վերաբերյալ ստացված տվյալների հիման վրա:
3.8.
Առաքումներն իրականացվում են ՀՀ, Երևան քաղաքի տարածքում։
3.9.
Ապրանքը ստանալու պահին Գնորդը Առաքչի ներկայությամբ պարտավոր է ստուգել ստացված Ապրանքների համապատասխանությունը (տեսականի, քանակ, արտաքին փաթեթավորում, որակ և այլն):
3.10.
Եթե Գնորդը չի գտնվում իր կողմից նշված հասցեում, ապա Առաքիչը կարող է հեռանալ: Այս դեպքում, ինչպես նաև Գնորդի կողմից սխալ հասցե տրամադրելու հետևանքով առաքումը չիրականացվելու համար Ընկերությունը ազատվում է պատասխանատվությունից, իսկ Գնորդը պարտավորվում է վճարել ինչպես տվյալ, այնպես էլ նոր հասցեով իրականցված առաքման ծառայության համար և փոխհատուցել Ընկերության կողմից կատարված ծախսերը։
3.11.
Գնորդն իրավունք ունի Վաճառողից (եթե Վաճառողը չի հիմնավորում, որ Ապրանքի թերությունները առաջացել են առաքման ընթացքում) պահանջել թերություններով առաքված Ապրանքի վերադարձ կամ փոխարինում՝ համապատասխան ՀՀ օրենսդրության: Ապրանքը չփոխարինելու դեպքում՝ Գնորդն իրավունք ունի հետ ստանալ վճարված գումարը: Տվյալ դեպքում Գնորդը ինքնուրույն է կրում Ապրանքը Վաճառողին վերադարձնելու կամ փոխարինելու հետ կապված Առաքման ծախսերը:
3.12.
Եթե Ապրանքի համար սահմանված է երաշխիքային ժամկետ, Գնորդն իրավունք ունի ապրանքի թերությունների հետ կապված պահանջներ ներկայացնել Վաճառողին, եթե թերությունները հայտնաբերվել են երաշխիքային ժամկետի ընթացքում:
3.13.
Օֆերտայի 3.11 կետերով սահմանված պահանջները ներկայացնելու ցանկություն ունեցող Գնորդը պետք է կապ հաստատի Ընկերության հաճախորդների աջակցման կենտրոնի հետ՝ ուղղորդման նպատակով։
4.
Վճարումներ
4.1.
Հայտի արժեքը բաղկացած է ապրանքի գնից և առաքման վճարից, որոնք ներառում են բոլոր հարկերը:
4.2.
Ապրանքի համար Գնորդը վճարումը իրականացնում է ՀՀ դրամով և անկանխիկ եղանակով:
4.3.
Ապրանքի գինը չի ներառում առաքման ծառայությունների վճարը և ապրանքի գինը չի կարող գերազանցել 400.000 ՀՀ դրամը։
4.4.
Գնորդը պարտավոր է վճարել Հայտի դիմաց ամբողջ գումարը։ Ամբողջ գումարը չվճարելու պարագայում Հայտը չի ձևակերպվում:
4.5.
Կատարելով անկանխիկ եղանակով վճարում՝ Գնորդը հաստատում է, որ տեղյակ է և համաձայն երրորդ անձ հանդիսացող բանկերի կամ վճարահաշվարկային կազմակերպությունների կողմից սահմանված կանոնների հետ, և որ Ընկերության նկատմամբ վերջիններիս կողմից սահմանված պայմանների հետ կապված որևէ առարկություն և/կամ պահանջ չունի և չի ունենա:
4.6.
Հայտի չեղարկման կամ Ապրանքի վերադարձի դեպքում Ընկերությունը կամ Ապրանքի տեսականու, քանակի կամ որակի համար պատասխանատու համապատասխան Վաճառողը պարտավորվում է վերադարձնել վճարված գումարը անկանխիկ եղանակով և 5 բանկային օրվա ժամկետում:
5.
Պատասխանատվություն
5.1.
Կողմերը պարտավորությունների չկատարման կամ անպատշաճ կատարման համար պատասխանատվություն են կրում` Հայաստանի Հանրապետության գործող օրենսդրությանը համապատասխան:
5.2.
Ընկերությունը որևէ պատասխանատվություն չի կրում երրորդ անձանց կողմից գրանցված Գնորդի ինքնության, ինչպես նաև հաշվի օգտագործման համար:
5.3.
Ընկերությունը պատասխանատու չէ Գնորդի կողմից տրամադրված տվյալների ճշտության և վավերականության համապատասխանության և դրանց պատճառով առաջացած հետևանքների համար:
5.4.
Ընկերությունը Գնորդի և Վաճառողի, Գնորդի և Առաքչի, Առաքչի և Վաճառողի, միջև ծագող պարտավորությունների համար պատասխանատվություն է կրում միայն այն մասով, որը կապված է իր կողմից Հարթակը սպասարկելու, Հայտը գրանցելու և փոխանցելու հետ, եթե այլ բան սահմանված չէ սույն օֆերտայում:
5.5.
Ապրանքի որակի, քանակի, այլ հատկանիշների, ինչպես նաև Առաքման ծառայության պատշաճության համար պատասխանատվություն են կրում Վաճառողը և/կամ Առաքիչը։
6.
Ֆորս Մաժոր
6.1.
Կողմերն ազատվում են սույնով նախատեսված պարտավորությունների չկատարման կամ ոչ պատշաճ կատարման պատասխանատվությունից, եթե այն առաջացել է անհաղթահարելի ուժի հետևանքով, ներառյալ բայց չսահմանափակված` հրդեհի, ջրհեղեղի, երկրաշարժի, պետական մարմինների գործողությունների կամ անգործությունների (մասնավորապես արժութային օպերացիաների սահամանափակումները), զինված գործողությունների հետևանքով, եթե այդ հանգամանքները ուղղակիորեն ազդել են սույն Օֆերտայի կատարման վրա: Նշված հանգամանքների վրա հասնելու դեպքում պարտավորությունների կատարումը հետաձգվում է այն ժամանակահատվածով, որի ընթացքում գործել են այդ հանգամանքները:
6.2.
Կողմը, որը անկարող է կատարել պարտավորությունները ֆորս մաժորային հանգամանքի հետևանքով, պարտավոր է 5 աշխատանքային օրվա ընթացքում գրավոր ծանուցել մյուս կողմին այն հանգամանքների ծագման և/կամ դադարման մասին, որոնք խոչընդոտում են իրականացնելու իր պարտավորությունները: Փաստերը, որոնք մատնանշում է համապատասխան կողմը իր վերը նշված ծանուցման մեջ, պետք է հաստատված լինեն իրավասու մարմնի կողմից:
7.
Վեճերի լուծման կարգ
7.1.
Սույն օֆերտայի շրջանակներում ծագած բոլոր վեճերը, տարաձայնությունները և պահանջները, ներառյալ՝ դրա կատարմանը, խախտմանը, դադարեցմանը կամ անվավերությանը վերաբերող, ենթակա են կարգավորման` կողմերի միջև բանակցությունների և խորհրդակցությունների ճանապարհով, իսկ դրանցում տասնհինգ օրյա ժամկետում հաջողության չհասնելու դեպքում՝ Հայաստանի Հանրապետության օրենսդրությանը համապատասխան` Հայաստանի Հանրապետության իրավասու դատական ատյաններում:
7.2.
Գնորդի կողմից Ընկերությանը կամ Վաճառողին կամ Առաքիչներին ուղղված դիմում/բողոքները կարող են ներկայացվել գրավոր կարգով՝ Ըկերության [email protected] էլեկտրոնային հասցեին ուղարկելու միջոցով:
8.
Եզրափակիչ դրույթներ
8.1.
Ընկերությունն իրավունք ունի ցանկացած ժամանակ Օֆերտայում միակողմանիորեն կատարել փոփոխություններ և լրացումներ, որի մասին Գնորդը կծանուցվի Ընկերության կայքէջից: Տվյալ դեպքում Ընկերությունը հորդորում է Գնորդին մինչև Պատվեր կատարելը համոզվել, որ փոփոխություններն իր համար ընդունելի են:
8.2.
Փոփոխությունները համարվում են ընդունված Փոփոխությունների կատարման պահին առկա Գնորդների կողմից Հարթակի միջոցով Գնում կատարելու պահից ։
8.3.
Գնորդը սույնով անվերապահորեն ընդունում է, որ տարբերակների միջև հակասության դեպքում գործում է վերջին ամսաթվով հրապարակված Օֆերտան։
8.4.
Ընկերությունն իրավունք ունի ամբողջությամբ կամ մասամբ զիջել Գնորդի կողմից ընդունված Օֆերտայով ամրագրված իր իրավունքները կամ փոխանցել իր պարտավորություններն այլ անձի` առանց Գնորդի համաձայնության:
8.5.
Գնորդն իրավունք չունի իր իրավունքները և պարտավորությունները փոխանել երրորդ անձի` առանց Ընկերության համաձայնության:
8.6.
Օֆերտայի որևէ դրույթ անվավեր կամ առոչինչ ճանաչվելու դեպքում մնացած դրույթները չեն փոփոխվում և մնում են ուժի մեջ:
8.7.
Օֆերտան կազմված է հայերեն լեզվով, սակայն կարող է թարգմանվել և հրապարակվել նաև այլ լեզուներով: Հայերենի և այլ լեզվով տարբերակների միջև հակասության դեպքում գերակա է հայերեն տարբերակը։
